Ақмола облысы бойынша қылмыстық-атқару жүйесі департаментінің қызметкерлері "Жеңіс диктанты" халықаралық тарихи акциясына белсене қатысты, - деп хабарлайды Polisia.kz.
Бұл шара Ұлы Отан соғысының оқиғаларын еске алып, ардагерлердің ерліктерін ұрпақ жадында сақтау мақсатында ұйымдастырылды.
Атбасар қаласындағы №1 мекемеде өткен диктантқа жеке құрам ерекше ынтамен қатысып, майдан мен тылдағы тарихи оқиғаларға қатысты білімдерін сынады. Бөлімше бастығы Шыңғыс Тоқтаровтың айтуынша, қызметкерлер тапсырмаларды 30–40 минут ішінде орындап, өз білімдерін көрсетуге ұмтылды. Ол әріптестерінің белсенділігі мен дайындық деңгейіне жоғары баға берді.
Мекеме штабының бастығы Татьяна Шейко тыл еңбеккері Фаина Давыдованың естеліктері арқылы соғыс жылдарындағы халықтың қажырлы еңбегі мен өмір сүру салты туралы көп мағлұмат алғанын атап өтті. Фаина Давыдовна – мекемеде ұзақ жылдар бойы қызмет еткен ардагер, оның әңгімелері жас буынға үлгі болуда.
Жас қызметкер Никита Бернт екі атасының Мәскеу мен Ленинград маңындағы шайқастарға қатысқанын айтып, олардың соғыс туралы көп әңгімелемегенін, бірақ бұл естеліктердің отбасы үшін қасиетті мұра екенін жеткізді. Ол бұл тарихи мұраны сақтап, болашақ ұрпаққа жеткізуді өзінің парызы деп санайды.
"Жеңіс диктанты" акциясы қатысушыларға Ұлы Отан соғысының тарихын тереңірек танып, ардагерлердің ерліктеріне тағзым етуге мүмкіндік берді. Мұндай іс-шаралар жас ұрпақтың патриоттық рухын көтеріп, тарихи сананы қалыптастыруда маңызды рөл атқарады.
