Ақмола облысында полиция тұрғынның жоғалған бұзауларын тауып берді. Іздеу шаралары екі облыс аумағында жүргізілді, – деп хабарлайды Polisia.kz.
14 қазанда Зеренді ауданының «102» жедел нөміріне тұрғын 9 бұзауының жоғалғаны туралы өтінішпен жүгінді. Ауыл тұрғынының айтуынша, малдың еркін жайылымнан жоғалып кетуіне қолайсыз ауа райы себеп болуы мүмкін екен. Әйел шығын сомасын 900 мың теңгеге бағалады.
4 күн бойы сәтсіз іздеуден кейін иелері полициядан көмек сұрады. Бірден криминалдық полиция бөлімінің қызметкерлері мен учаскелік инспектор іздеу іс-шараларын ұйымдастырды. Бірнеше күн бойы тәртіп сақшылары Солтүстік Қазақстан облысының Лобаново, Имантау, Альжанка, Заря ауылдарының маңындағы орман алқаптарын, жақын маңдағы елді мекендерді, сондай-ақ аумақты тексерді.
Қабылданған шаралардың нәтижесінде полицейлер Ақмола облысының күнбағыс алқаптарында жоғалған малды тапты. Барлық бұзаулар иесіне қайтарылды. Өз малын қылмыстық қол сұғушылықтан қорғау мақсатында полиция малды қараусыз қалдырмауға, оны ұстау орындарының нығаюын қадағалауға, мал басын белгілеуге және таңбалауға кеңес береді.
