Ақмола облысында полиция қызметкерлері жол бойында бұзылған жүк көлігінің жүргізушісіне көмектесті, - деп хабарлайды Polisia.kz.
Ақмола облысы аумағындағы Жақсы – Есіл – Бұзұлұқ тасжолында Беларуське бағыт алған ауыр жүк көлігінің жүргізушісі қиын жағдайға тап болды. Жол бойында фурада техникалық ақау шығып, ауыр жүк көлігі өз маршрутын жалғастыра алмады.
Патрульдік полиция қызметкері Юрий Ураков балалар автобусын сүйемелдеп келе жатып, жолдың шетінде тұрған жүк көлігін байқаған. Кейін сол маршрут бойынша қайтып келе жатқанда көліктің әлі де сол қалпында тұрғанын көріп, жағдайды нақтылау және қажетті көмек көрсету үшін тоқтаған.
Жөндеу жұмыстары кезінде патрульдік инспектор жол қозғалысының қауіпсіздігін қамтамасыз етіп, басқа жүргізушілерді ықтимал қауіптер туралы ескерткен және апаттың алдын алу шараларын қабылдаған.Полицейдің жедел әрекетінің арқасында техникалық ақау тез арада жойылып, жүргізуші өз маршрутын жалғастырған және қазақстандық патрульшілердің қызметіне ризашылық білдірген.
Юрий Ураков ішкі істер органдарында 12 жылдан бері қызмет атқарып келеді және осы жылдар ішінде саптық құрылымда жұмыс істейді. Патрульдік полицияда қызмет еткен уақытында ол бірнеше рет жол қозғалысына қатысушыларға, әсіресе ауа-райының қолайсыз кездерінде және трассаның қиын учаскелерінде көмек көрсетіп келген. Мұндай жағдайлар кезінде полиция қызметкерлері жүргізушілер үшін жалғыз сенімді көмекші болып саналады.
Бұл оқиға патрульшілердің күнделікті жол қауіпсіздігін қамтамасыз ету және жолда қиын жағдайға тап болғандарға көмек көрсету маңыздылығын тағы бір мәрте дәлелдеді.
