Ақмола облысында “Жас сақшы” сыныбының оқушылары марапатталды, — деп хабарлайды Polisia.kz.
Ақмола облысының полиция департаментінде Қазақстан Республикасы Конституциясының 30 жылдығына арналған салтанатты іс-шара өтті. Салтанатты іс-шараға Ішкі істер органдарының ардагерлері, департамент басшылығы мен жеке құрам қатысты.
Облыстық ведомство басшысы Нұрсұлтан Мукашев әріптестері мен ардагерлерін мемлекеттік мерекемен құттықтап, “Заң мен тәртіп” қағидаты полиция қызметкерлері қызметінің негізгі бағыты болуға тиіс екенін атап өтті.
— Біз қоғамның сенімін ақтауға және азаматтардың тыныштығы мен қауіпсіздігінің сенімді кепілі болуға міндеттіміз, - деді Нұрсұлтан Мукашев.
Бұл күні “Жас сақшы” мамандандырылған сынып оқушылары мен оқушылардың ата-аналарына ерекше көңіл бөлінді. Балалар алғыс хаттар мен естелік ретінде патрульдік автокөліктердің кәдесый үлгілерін алды.
Сонымен қатар “Жас сақшы” сыныбының жетекшісі Нұржан Ешімбай және Көкшетау қаласының №11 мектеп-гимназиясының директоры Ботагөз Құсақаева марапатталды. Ішкі істер министрі Ержан Саденовтің құқығымен үш қызметкер “Құқық тәртібін қамтамасыз етуге қосқан үлесі үшін” медалімен, тағы төрт қызметкер “Ішкі істер органдарының үздігі” төсбелгісімен марапатталды, сонымен қатар ҚР ІІМ бұйрығымен бірқатар полицейлерге кезекті арнайы атақтар берілді.
Мереке құрметіне, қызметтік міндеттерін адал атқарған полиция қызметкерлері грамоталармен және алғыс хаттармен, оның ішінде Ақмола облысы ПД бастығының бұйрығымен марапатталды. Салтанатты жағдайда ардагерлер ұйымының жұмысына белсенді қатысқаны үшін, Конституция күніне орай және ұлтжандылық тәлімгерлік үшін ішкі істер органдарының ардагерлері атап өтілді.
Мерекелік шара концертпен аяқталды.
Айта кету керек, мереке күндері ақмола полицейлері жаппай іс-шаралар кезінде өңір тұрғындарының қауіпсіздігін қамтамасыз ете отырып, күшейтілген режимде қызмет атқаратын болады.
