Ақмола полицейлері қаза тапқан әріптестерін құрметпен еске алды, - деп хабарлайды Polisia.kz.
Отан қорғаушылар күні мен Жеңіс күніне орай Ақмола облысы полиция департаментінде ерекше тағзым рәсімі өтті. Қызметтік борышын өтеу кезінде ерлікпен қаза тапқан полиция қызметкерлерінің құрметіне арналған мемориал алдына гүл шоқтары қойылып, еске алу митингі ұйымдастырылды.
Шара департамент ғимараты жанындағы ескерткіш аллеясында өтті. Тәуелсіздік жылдарында қылмыспен күресте өмірін қиған 40 ақмолалық тәртіп сақшысының есімдері – тек гранит тақтада ғана емес, әріптестерінің жүрегінде мәңгі сақталған.
Митингке ішкі істер органдарының ардагерлері, қазіргі полиция қызметкерлері және басты қонақтар – қаза тапқан батырлардың аналары мен жұбайлары қатысты. Олар үшін бұл күн – естен кетпес сағыныш пен мақтанышқа толы сәт.
Полиция департаментінің бастығы Нұрсұлтан Мұқашев сөз алып, қайсар ерлерді тәрбиелеген аналарға алғыс білдірді:
– Сіздердің балаларыңыз – нағыз ержүрек жандар. Олардың ерлігі – біз үшін мәңгілік өнеге. Біз оларды ұмытпаймыз, ұрпақ жадында сақтау – біздің борышымыз, – деді ол.
Гүл шоқтарын қоюдан кейін үш мәрте қару атысы орындалып, қаза тапқандар рухына бір минут үнсіздік жарияланды.
Бұл – тек рәсім емес, жүректегі естелікке айналған құрметтің нышаны. Ұмытылмас ерлік – мәңгілік естелікте.
