Маңғыстау облысы бойынша ҚАЖ департаментіне қарасты Ақтау қалалық пробация қызметінің есебінде тұрған сотталғандармен кездесу өтті, – деп хабарлайды Polisia.kz.
Жиынға қалалық прокуратура, пробация қызметі, "Жанұя" отбасын қолдау орталығы, Мансап орталығы және облыстық психоневрологиялық диспансер өкілдері қатысты.
Мамандар сот белгілеген жеке шектеулерді кеңінен түсіндірді: біріне 20:00-ден кейін, енді біріне 22:00-ден кейін үйден шығуға тыйым салынған, кейбірі қоғамдық жұмыстарға тартылған, ал басқалары мәжбүрлі еңбек сағаттарын өтеп жүр.
Спикерлердің айтуынша, бұл талаптар – жай қағаз жүзіндегі рәсім емес. Оларды бұзу елеулі салдарға әкелуі мүмкін: қалған мерзімге теріс әсер етеді, тіпті бас бостандығынан айырумен түзеу мекемесіне қайта жіберілу қаупі бар.
Қатысушыларға шектеулерді сақтау жауапкершілігі толықтай өздеріне жүктелетіні түсіндірілді. Сот шешімі әрбір құқық бұзушылықтың сипатына қарай шығарылады, ал оны орындамау ең алдымен сотталғандардың өз мүмкіндігіне, қоғамға қайта бейімделуіне кері әсерін тигізеді.
Сотталғандар белсенділік танытып, өз міндеттері мен құқықтары бойынша сұрақтар қойды. Мамандар әрекет ету алгоритмдерін, әлеуметтік және психологиялық қолдау қызметтерінің қолжетімділігін, сондай-ақ қайта құқық бұзушылықтың алдын алу шараларын егжей-тегжейлі түсіндірді.
Кездесу мазмұнды әрі тәжірибеге бағытталған форматта өтті. Әрбір қатысушы өз құқықтары мен міндеттерін, пробация талаптарын сақтау жолдарын айқын түсініп шықты. Бұл олардың алдағы заңға сай өмір сүруіне тікелей ықпал етпек.
