Ақтөбе облысы ҚАЖ департаментінің №70 мекемесінде Конституция күніне орай спорттық іс-шара өтті, — деп хабарлайды Polisia.kz.
Қазақстан Республикасы Конституциясының 30 жылдығына орай Ақтөбе облысы бойынша Қылмыстық-атқару жүйесі департаментінің №70 мекемесінде жеке құраммен жұмыс жөніндегі бөлімшенің ұйымдастыруымен қызметкерлер арасында спорттық жарыс ұйымдастырылды.
Іс-шараның негізгі мақсаты – ұжымдық ауызбіршілікті арттыру, салауатты өмір салтын насихаттау, спортқа қызығушылықты дамыту және моральдық-психологиялық ахуалды жақсарту болды.
Жарыс барысында қызметкерлер асық ату, арқан тартыс, ләңгі тебу сынды ұлттық ойындармен қатар, заманауи спорттық сайыстарда да бақ сынасты. Қатысушылар белсенділік танытып, жоғары дайындық пен ұйымшылдықтарын көрсетті.
Сайыс нәтижесінде: “Бүркіт” тобы – І орын, “Арлан” тобы – ІІ орын, “Арыстан” тобы – ІІІ орын иеленді.
Жеңімпаздарға дипломдар мен алғыс хаттар табысталды. Барлық қатысушы көтеріңкі көңіл күйге бөленіп, ұжымдық бірлікті нығайта түсті.
Мұндай шаралар қызметкерлердің дене дайындығын жетілдіріп қана қоймай, ұжым ішінде достық пен ынтымақты арттыруға зор ықпал етеді.
