Ақтөбе облысында полиция қызметкерлері Конституция күнін салтанатты түрде атап өтті, - деп хабарлайды Polisia.kz.
Ақтөбе облыстық полиция департаментінде Қазақстан Республикасының Конституция күніне арналған салтанатты іс-шара өтті. Мерекелік жиынға департамент бастығы Абай Жүсіпов, ішкі істер органдарының ардагерлері және жеке құрам қатысты.
Салтанатты рәсім Мемлекеттік Туды салтанатты түрде алаңға енгізумен басталып, мерекеге арнайы дайындалған бейнероликтің көрсетілімімен жалғасты. Құттықтау сөзінде департамент бастығы жеке құрам мен ардагерлерді мемлекеттік мерекемен құттықтап, олардың құқықтық тәртіп пен қоғамдық қауіпсіздікті қамтамасыз ету жолындағы адал еңбектеріне алғыс білдіріп, кәсіби қызметтеріне табыс тіледі.
Іс-шара барысында қызметте ерекше көзге түскен тәртіп сақшыларына ведомстволық марапаттар табыс етілді. Сондай-ақ ішкі істер органдарының дамуына үлес қосқан қызметкерлер мен ардагерлер департамент бастығының Алғыс хаттарына ие болды.
Бұл күні жас мамандардың ата-аналары да назардан тыс қалған жоқ – олар да полиция департаменті басшылығының Алғыс хаттарымен марапатталды.
Мерекелік шара соңында талантты полиция қызметкерлері мен кәсіби әртістердің орындауындағы патриоттық әндер шараға ерекше сән беріп, қатысушыларға көтеріңкі көңіл күй сыйлады.
