Ақтөбе облысы ПД-ның мұражайында көктемгі су тасқынындағы полиция жұмысынан сыр шертетін жылжымалы көрме ұйымдастырылды, – деп хабарлайды Polisia.kz.
Биылғы жылы халқымыздың бірлігі мен барлық құрылымдардың жұмысының сын сағаты болған оқиға – көктемгі су тасқыны болды.
Су тасқыны кезінде өңірде полиция қызметкерлері күшейтілген режимде қызмет атқарып, төтенше жағдай жарияланған өңірлерде тәулік бойы қызмет етті. Айтып келмеген апат салдарынан абдырап қалған халықты сабырға шақыра отырып, олар бөгеттер орнату, тұрғындарды эвакуациялау, адамдардың және мал-мүлкінің қауіпсіздігін қамтамасыз ету жұмыстарына жұмыла қатысты.
Олардың ішінде бірнеше күн бойы су басқан саяжай аймақтарының тұрғындарын арқалап шығарған Ақтөбе қалалық полиция бөлімінің учаскелік полиция инспекторы Нұрхат Сәлімгереев, түнгі мезгілде ауылға тақалған судан тұрғындарды құтқару үшін етігімен су кешкен Әйтеке би ауданы полиция бөлімінің учаскелік полиция инспекторы Дархан Кемелтаев, түн ортасында селді су тасқынының құрсауында автокөлігімен қалған көпбалалы отбасын құтқаруға қатысқан Ойыл ауданы полиция бөлімінің учаскелік полиция инспекторы Есболат Әділханов, су басқан аймақтан тұрғындардың жылқыларын құтқарып шыққан Қобда ауданы полиция бөлімінің учаскелік полиция инспекторы Бексұлтан Қылышбаев бар.
Табиғи сипаттағы төтенше жағдай кезінде тасқынға қарсы тайсалмай күрескен тәртіп сақшыларының еңбегі еленіп, олардың бірқатары мемлекеттік наградалармен марапатталды.
Төтенше жағдай кезінде батылдық пен ерлік көрсеткен полицейлердің еңбегін ұмытпау мақсатында 25 желтоқсан күні Ақтөбе облысының полиция департаменті мұражайының ұйымдастыруымен сол бір қиын-қыстау кездегі полиция жұмысы туралы сыр шертетін көшпелі көрме ұйымдастырылды. Көрмеге су тасқыны кезіндегі еңбегі мен батылдығы үшін мемлекеттік награда «Ерлігі үшін» медалімен марапатталған полиция капитаны Нұрхат Сәлімгереев шақырылып, жиналғандарға Ақтөбе қаласында болған су тасқынына байланысты атқарылған жұмыстар туралы айтып берді. Кейіпкердің әсерлі әңгімесі мен сол бір кезең туралы сырт шертетін фотосуреттер мен оқиғалар тізбегі жиналғандардың, оның ішінде жас полиция қызметкерлерінің ерекше ықыласы мен қызығушылығын тудырды.
