Астанада азаматтарға алғаш рет жеке куәліктерін тапсыруға арналған салтанатты іс-шара ұйымдастырылды

Қазақстан Республикасы Конституциясының 30 жылдығына орай алғашқы жеке куәліктерді салтанатты табыстау рәсімі өтті, — деп хабарлайды Polisia.kz.

Астанада азаматтарға алғаш рет жеке куәліктерін тапсыруға арналған салтанатты іс-шара ұйымдастырылды. Бұл маңызды құжатты алғаш рет алып отырған азаматтарға арналған рәсім ерекше атмосферада өтті.

Іс-шараға көші-қон қызметі басқармасының бастығы Ербол Махметов қатысып, қатысушыларды құттықтап, естелік сыйлықтар табыс етті. Жеке куәлік иегерлерінің қатарында 16-дан 40 жасқа дейінгі азаматтар болды. Олар құжаттарды дәстүрлі жолмен де, онлайн-сервис арқылы да тапсырған.

Айрықша сәттердің бірі – тарихи Отанына оралып, алғаш рет Қазақстан Республикасының азаматтығын рәсімдеген Абдихалил Баратовқа жеке куәліктің табысталуы болды.

– Мен Қазақстан Республикасының азаматтығын алдым. Барлығы өте жылдам өтті. Үлкен рақмет, –деп атап өтті Абдихалил Баратов.

– Бүгін мен өзімнің алғашқы жеке куәлігімді алдым. Полиция департаментінде құжатты алу – мен үшін үлкен қуаныш. Мұндай мүмкіндік көпке беріле бермейді, әрі мұның Конституция күні қарсаңында өтуі ерекше мәнге ие, — деді колледж студенті Айымгүл Даут.

— Мен Қазақстан азаматы болғаныма мақтанамын және алғашқы құжатымды алғаныма өте қуаныштымын, – деді 11-сынып оқушысы Ақбота Анарбай.