Астанада Даулет Темірхановтың «Бүгілмес болат, сынбас семсер» атты авторлық кітабының таныстырылымы өтті

Астанада Даулет Темірхановтың «Бүгілмес болат, сынбас семсер» атты авторлық кітабының таныстырылымы өтті, – деп хабарлайды Polisia.kz.

Елордада ҚР Ұлттық академиялық кітапханасында еліміздегі алғашқы арнайы жасақ бөлімшесінің негізін қалаушы әрі алғашқы командирі, ҚР ІІМ Еңбек сіңірген қызметкері және ҚР Құрметті ардагері, Әлем чемпионы, отставкадағы полиция полковнигі Даулет Темірхановтың «Бүгілмес болат, сынбас семсер» атты авторлық кітабының қазақ және орыс тілдеріндегі тұсаукесері өткізілді.

Даулет Темірханов көп жылдар бойы елордалық полиция департаментінде қызмет атқарып, Астананың қалыптасуы мен өркендеуіне елеулі үлес қосып, қаламыздағы қылмыспен күресте зор еңбек сіңірген тұлға ретінде танылды.

Бұл кітап 1990-жылдардағы арнайы жасақтың құрылуы мен оның рэкетпен күрескен тарихын баяндайды. Бопсалау, кепілге алынған адамдарды босату, есірткі саудасы, экстремизм мен терроризм актілерін жою сынды күрделі оқиғаларды ашып көрсетеді. Отанға қызмет ету, ерлік пен жауынгерлік борышты насихаттайтын бұл кітапта арнайы жасақ қызметінің қалыптасу мен даму кезеңдері туралы бұрын-соңды жарық көрмеген тарихи хронология берілген. Қауіпті жағдайлармен күнделікті бетпе-бет келіп, қарулы қылмыскерлерге қарсы тұратын қазақстандық арнайы жасақ қызметкерлерінің ерекше ерлігі мен батылдығы оқырмандарды өзіне баурап алатындығы сөзсіз.

Тұсаукесерге ҚР белгілі мемлекеттік және қоғам қайраткерлері, құқық қорғау органдарының генералдары, депутаттар, ақын-жазушылар, ғалымдар мен зерттеушілер қатысты. Іс-шара аясында Д. Темірхановтың өмірі мен кәсіби қызмет жолын сипаттайтын фотокөрме, сондай-ақ театр және кино актерлерінің орындауында кітаптан монологтар оқылды.

ҚР мемлекеттік қайраткері Әлихан Бәйменов Дәулет Темірхановты бейбіт заманның батыры деп санайды. Ол: «Кітапта баяндалған сыған баронының қызын құтқару, кепілге алынғандарды босату, экстремистермен болған қақтығыстар, 2011 жылы уақытша ұстау изоляторында орын алған оқиғалар және басқа да детективке бергісіз операциялар Дәулет Темірхановтың өз қызмет жолында қаншалықты жауапты, қатерлі сәттерді басынан өткергенін көрсетеді», — деді.