Астанада ер адам 11 млн теңгенің ұрлығын жасады, - деп хабарлайды Polisia.kz.
Жедел-іздестіру іс-шараларының нәтижесінде елордада полицейлер пәтер ұрлығына күдікті азаматты қолға түсірді.
Тергеу мәліметінше, күдікті қылмыс жасамас бұрын пәтерді алдын ала бақылап, үй иелерінің жоқтығына көз жеткізген. Сол сәтті пайдаланған ол кілт таңдау әдісімен үйге заңсыз кіріп, жатын бөлмедегі шкафтан 20 мың АҚШ долларын және зергерлік бұйымдарды — жүзік, сырға мен білезікті ұрлап кеткен.
Келтірілген материалдық шығынның жалпы көлемі 11 млн теңгеден асты. Тексеру барысында күдіктінің ұрланған ақшаның бір бөлігіне автокөлік сатып алғаны, ал зергерлік бұйымдарды ломбардқа өткізіп жібергені анықталды.
Қазіргі уақытта ол ұсталып, уақытша ұстау изоляторына қамалды. Барлық заттай дәлелдемелер тәркіленді. Ұрлық дерегі бойынша сотқа дейінгі тергеп-тексеру амалдары жалғасуда.
