Астанада киберқылмысқа қарсы іс-қимыл басқармасы қаржылық сауаттылықты арттыру бойынша дәріс өткізді, - деп хабарлайды Polisia.kz.
Астана қалалық киберқылмысына қарсы іс-қимыл басқармасының қызметкерлері Еуразия ұлттық университеті мен Назарбаев университетінде қаржылық сауаттылықты арттыру мақсатында дәрістер ұйымдастырды.
Бұл дәрістердің басты мақсаты — студенттерді қаржылық қауіпсіздік және кибер алаяқтыққа қарсы қорғау шаралары туралы ақпараттандыру. Қазіргі таңда интернет алаяқтығы мен қаржылық қылмыстардың санының артуына байланысты қаржылық сауаттылықты арттыру өзекті мәселеге айналғаны анық.
Еуразия ұлттық университеті мен Назарбаев университетінің студенттері мен оқытушыларына арналған дәрістерде қаржылық қауіпсіздікті қамтамасыз ету жолдары, киберқылмыстың алдын алу және онлайн алаяқтықтан қорғану әдістері туралы кеңестер ұсынылды. Сонымен қатар дәрістер барысында қатысушыларға интернет алаяқтықтың негізгі түрлері мен олардан сақтану тәсілдері туралы толыққанды ақпарат берілді.
Киберқылмыспен күресу және қаржылық сауаттылықты арттыру бағытындағы осындай іс-шаралар Қазақстан азаматтарының ақпараттық қауіпсіздігін нығайтуға және қаржылық құқықтарын қорғауға үлес қосады.
