Қазақстан Республикасының Ұлттық музейінде республикалық ғылыми-практикалық конференция өтті, – деп хабарлайды Polisia.kz.
Конференция ҚР Мәдениет және ақпарат министрлігінің, Ұлттық музейінің, "Қазақстан Республикасы Қарулы күштерінің ардагерлері" республикалық қоғамдық ұйымы және "Atamnyn amanaty" қоғамдық бірлестігінің бастамасымен ұйымдастырылды.
Пікірталас алаңына күш құрылымдарының, мұражайлардың, әскери жоғары оқу орындарының, ардагерлер қауымдастығының және қоғамдық ұйымдардың өкілдері, сондай-ақ Ұлттық ұлан ардагерлері шақырылды. Форумда құқықтық тәртіп әскері атынан Ұлттық ұлан Бас қолбасшысының тәрбие және әлеуметтік-құқықтық жұмыстар жөніндегі орынбасары, Халық қаһарманы Қайрат Үмбетов құттықтау сөз сөйледі. Ол ашық диалогтың маңыздылығына тоқталып, бірлескен жұмыстың оң нәтиже беретінін атап өтті және патриоттық тәрбиені дамытуға бағытталған бастамаларға қолдау білдірді.
- Басқосу аясында біз тарихи жадыны сақтауға, ұрпақтар сабақтастығын нығайтуға және жастарды патриоттық тұрғыда тәрбиелеуге арналған негізгі мәселелерді талқыладық, - дейді "Atamnyn amanaty" ҚБ басқармасының төрағасы Мұрат Молдағалиев.
Конференция шеңберінде әскери-тарихи жаңғыру мен білім беру бағытындағы форматиканың үйлесімді әдістері, әскери қызметшілерді хабар-ошарсыз кетті деп тану жөніндегі Қазақстан Республикасы заңнамасының өзекті аспектілері, соғыс жылдарындағы қазақстандық жауынгерлердің тағдырын мұрағаттық іздестіру практикасы мәселелері көтерілді.
Ұйымдастырушылар бұл бағыттағы жүйелі жұмыс ұрпақтар арасындағы байланысты нығайтуға, жастардың ел тарихына деген қызығушылығын арттыруға және оның болашағына жауапкершілікпен қарауды қалыптастыруға мүмкіндік беретініне сенім білдірді.
