Астанада полицей алаяқтықтың бетін ашты, – деп хабарлайды Polisia.kz.
Интернеттегі алаяқтықтың құрбаны болған елорда тұрғыны полиция қызметкерлерінің жедел әрекетінің арқасында ақшасын қайтарып алды.
Жәбірленушінің OLX платформасынан ас үй жиынтығын сату туралы хабарландыру тауып алғаны анықталды. Болжалды «шебермен» келіссөздер жүргізгеннен кейін ол 150 мың теңге көлемінде алдын ала төлем жасауға келісіп, көрсетілген шотқа аударған. Алайда, ақшаны алғаннан кейін сатушы байланысын тоқтатып, жиһазды жеткізбеді.
Аталмыш іс бойынша тергеуді Байқоңыр аудандық ІІБ тергеу бөлімінің тергеушісі полиция капитаны Нұрболат Айтбай жүргізді. Ол алаяқтарды анықтап қана қоймай, келтірілген шығынның орнын толтыруға көмектескен.
Полиция капитаны Айтбай Нұрболат ішкі істер органдарындағы қызметін 2016 жылы Б.Бейсенов атындағы Қазақстан Республикасы Ішкі істер министрлігінің академиясына оқуға түсіп, бастаған. 2020 жылы оқуды аяқтағаннан кейін ол ұрлық, тонау, зорлық-зомбылық және алаяқтық сияқты мүліктік қылмыстарды тергеуге маманданған тергеуші болып жұмыс істей бастады. 2022 жылдан бастап полиция капитаны заманауи қылмыстармен күресте жоғары құзыреттілігін көрсете отырып, интернеттегі алаяқтықты ашуға белсене араласып келеді.
Биылдың өзінде полиция капитаны Нұрболат Айтбай 50-ге жуық қылмыстың бетін ашты.
