Биыл алғаш рет қылмыстық-атқару жүйесі қызметкерлерінің күні атап өтіледі. Бұл мереке — жүйеде күн сайын тәртіп пен қауіпсіздікті қамтамасыз ететін мамандардың еңбегін бағалаудың символы. Астана қаласы ҚАЖД-ға қарасты №3 мекеменің бақылаушысы Нұрсұлтан Атамбаев 45 ұялы телефонды мекемеге жеткізуге бағытталған әрекетті дер кезінде тоқтатып, кәсібилігін танытты, - деп хабарлайды Polisia.kz.
Биыл елімізде алғаш рет қылмыстық-атқару жүйесі қызметкерлерінің күні атап өтіледі. Бұл мереке — жүйеде күн сайын қауіпсіздікті қамтамасыз етіп, өз ісіне адал қызметкерлердің еңбегін бағалайтын ерекше күн. Осындай салада Нұрсұлтан сияқты кәсіби мамандардың болуы – үлкен мақтаныш.
Астана қаласы бойынша ҚАЖД-ға қарасты №3 мекеменің бақылаушысы Нұрсұлтан Атамбаев биыл шынымен де ерекше нәтижеге қол жеткізді. Оның мұқияттылығы мен қызметке деген жауапкершілігінің арқасында мекемеге ұялы телефондарды жеткізуге бағытталған 45 әрекет дер кезінде әшкереленді.
Нұрсұлтан әр күнге бір ғана мақсатпен кіріседі — мекеме қауіпсіздігін қамтамасыз ету және режимдік талаптардың бұзылуына жол бермеу. Әрбір көрсеткіштің артында нақты еңбек жатыр: ұқыпты бақылау, тиянақты тексеріс және көпшіліктің назарынан тыс қалатын ұсақ-түйектерді дер кезінде байқау қабілеті.
Мұндай қызметкерлер — даңқ іздемейтін, бірақ жүйенің қалыпты әрі тұрақты жұмыс істеуіне тікелей ықпал ететін үнсіз кәсіби мамандар.
45 анықталған әрекет — жай ғана статистика емес. Бұл — тәртіптің, тәжірибенің және шынайы қызметтік жауапкершіліктің нақты көрсеткіші.
