Астанада тыйым салынған уақытта алкоголь өнімдерін сатқан дүкен анықталды, – деп хабарлайды Polisia.kz.
"Заң мен тәртіп" қағидаты негізінде тәртіп сақшылары қоғамдық қауіпсіздікті қамтамасыз ету және құқық бұзушылықтардың алдын алу мақсатында рейдтік іс-шаралар өткізуде. "Учаске" жедел-профилактикалық іс-шарасы барысында Абылайхан даңғылының бойындағы дүкенде сағат 23:00-ден кейін алкоголь өнімін сату дерегі анықталды.
Атап айтқанда, дүкен иесі тарапынан 1,5 литрлік құйылмалы сыра сатылған. Бұл әрекет Қазақстан Республикасының заңына сәйкес құқық бұзушылық болып саналады. Дүкен иесі жауапкершілікке тартылып, полицейлер тиісті шара қолданды.
Сондай-ақ 44 жастағы азамат Рысқұлбеков көшесінде тұрғын үй ауласындағы бағандарда өз жарнамасын заңсыз орналастырған. Осылайша ол қала аумағындағы абаттандыру ережелерін бұзған. Аталған дерекке қатысты қала тұрғыны құқық бұзушылық жасағаны үшін кінәлі деп танылып, тәртіп сақшылары шара қолданды.
Полиция қызметкерлері сағат 23:00-ден таңғы 08:00-ге дейін алкоголь өнімдерін сатуға қатаң тыйым салынғанын, бұл талапты бұзған кәсіпкерлік нысандарға айыппұл салынып, қайталанған жағдайда лицензиясынан айыруға дейінгі шара қолданылуы мүмкін екенін ескертеді.
