Қазақстан Конституциясымен құрдас полиция майоры Қоблан Мамитан – есірткі қылмысына қарсы күресте алдыңғы шепте жүрген, адалдық пен отансүйгіштікті өмірлік ұстаным еткен жас офицер, - деп хабарлайды Polisia.kz.
Қоблан Мамитан – Қазақстан Республикасының Конституциясы қабылданған жылы дүниеге келген, бүгінде ел тыныштығы мен қауіпсіздігін қамтамасыз ету жолында алдыңғы сапта қызмет етіп жүрген білікті офицер. Ол - Атырау облысы полиция департаментінің есірткі қылмысына қарсы іс-қимыл басқармасында жедел уәкіл, полиция майоры.
Балалық шағынан тәртіп пен әділдікті өмірлік қағида еткен Қобланның құқық қорғау саласын таңдауы да отбасылық дәстүрмен байланысты. Әкесі – ішкі істер саласының ардагері, полиция подполковнигі Ыбрай Мамитанұлы баласына адалдық пен отансүйгіштікті дарытып, азамат ретінде қалыптасуына зор үлес қосқан.
2012–2016 жылдары ҚР Ішкі істер министрлігінің Малкеджар Бөкенбаев атындағы Ақтөбе заң институтында білім алған Қоблан оқуын лейтенант шенімен тәмамдап, еңбек жолын учаскелік полиция инспекторы болып бастаған. Бүгінде ол есірткі қылмысына қарсы күрес саласында қырағылық пен жауапкершілік танытып, қоғамдық қауіпсіздікті қамтамасыз етуге елеулі үлес қосып келеді.
– Бұл сала қырағылық пен табандылықты талап етеді. Азаматтардың сенімін ақтау – басты міндетіміз. Антымызға адал болып, ел тыныштығын сақтау – мен үшін үлкен абырой, – дейді полиция майоры.
Қызметтен тыс уақытта Қоблан спортпен белсенді шұғылданып, салауатты өмір салтын насихаттап жүр. Ол кикбоксингтен Қазақстан чемпионы атанып, спорт шеберіне үміткер атағын алған. Жасөспірімдер арасында спортты дамытуға атсалысып, түрлі жарыстарға қолдау көрсетеді. Отбасында адал жар, екі баланың қамқор әкесі.
Күн сайын қоғам тыныштығын күзетіп, сынға толы қызметін абыроймен атқарып жүрген осындай сақшылар – мемлекет пен халық арасындағы сенімді байланыстың берік тірегі.
