15 мамырда Атырау облысының өңірлік коммуникациялар қызметінде «Суға шомылу маусымына дайындық» және «Балалардың терезеден құлауы» тақырыптарына арналған баспасөз конференциясы өтті, – деп хабарлайды Polisia.kz.
Іс-шараның спикері ретінде Атырау облысы ТЖД бастығы азаматтық қорғау полковнигі Сағынбек Өмірзахов сөз сөйледі. Ол ағымдағы жылдың 11 наурызында облыстағы су объектілеріндегі жазатайым оқиғалардың алдын алу мақсатында алдағы шомылу маусымына дайындық мәселелері бойынша ТЖК отырысы өткенін мәлімдеді. Отырыста жүзуге арналған жағажайлар құру туралы маңызды мәселе қаралды.
Алдағы суға шомылу маусымы үшін тағы 16 жағажай құрылады, оның ішінде:
– Атырау қаласында – 4;
– Индер ауданында – 1;
– Құрманғазы ауданында – 10;
– Жылыой ауданында – 1.
Ағымдағы жылы қала мен аудандардың коммуналдық қызметтерін бекіте отырып, коммуналдық жағажайларды құруға басты назар аударылады. Сонымен қатар, 31 орын қауіпті деп танылды, ал жүзу үшін жабдықталмаған 40 орын, яғни 193 тыйым салу белгілері бар жабайы жағажайлар анықталды.
Жабайы жабық жағажайлардағы кезекшілік үшін Полиция департаменті мен Атырау облысының Төтенше жағдайлар департаменті арасында өзара іс-қимыл жоспары жасалып, бекітілді. Жоспарға сәйкес шомылу маусымы кезінде жылжымалы құтқару посттарының кезекшілігі ұйымдастырылады. Жалпы, жазғы шомылу маусымында қауіпсіздікті қамтамасыз ету үшін барлық қажетті шаралар қарастырылған.
Онымен қоса, баспасөз конференциясында балалардың терезеден құлау тақырыбы да қозғалды. Атырау облысында жыл басынан бері бір жағдай тіркелгендігі айтылды. Ағымдағы жылдың 8 мамырында Атырау облысының Жылыой ауданында ата-анасының қарауынсыз қалған 2017 жылы туылған бала төртінші қабаттағы терезеден құлау салдарынан жарақат алды, қазіргі уақытта баланың жағдайы тұрақты. Терезеден құлау салдарынан балалардың жарақаттануы мен өлімінің негізгі себептері ата-аналардың немқұрайлылығы мен жауапсыздығы болып табылады.
Осыған байланысты, Сағынбек Өмірзахов ата-аналарға балаларын қараусыз қалдырмауға, сондай-ақ, олармен әр түрлі қауіпсіздік тақырыптарында әңгімелесуді ұмытпауға шақырды.
