Атырау облысында Тәлімгерлер кеңесінің кезекті отырысы өтті, - деп хабарлайды Polisia.kz.
Атырау облысы полиция департаментінде Тәлімгерлер кеңесінің 2024 жылға арналған жоспарына сәйкес кезекті отырыс өтті. Жиынға кеңес төрағасының орынбасары, отставкадағы полиция полковнигі Жанболат Олжабаев жетекшілік етті.
Отырыста Тәлімгерлер кеңесінің биылғы жылы атқарған жұмыстарының қорытындылары жасалып, алдағы 2025 жылға арналған жұмыс жоспары бекітілді. Сонымен бірге қызметке жаңадан қабылданған жас мамандар мен олардың тәлімгерлерінің бірлескен жұмысының нәтижелері талқыланды.
Жас мамандардың таңдаған кәсібін терең меңгеруіне, қызметтік міндеттерін сапалы орындау әдістерін үйренуіне және ішкі істер органдарына тез бейімделуіне ерекше үлес қосқан бірқатар қызметкерлерге кеңес төрағасының Алғыс хаттары салтанатты түрде табысталды.
Кеңес мүшелері полиция департаментінің қызметкерлеріне ұзақ жылғы тәжірибеден түйген білімі мен кеңестерін ұсынып, қызмет барысында туындайтын мәселелерді тиімді шешу жолдарын ортаға салды. Сондай-ақ, полицияның беделін арттыру мақсатында маңызды ұсыныстарымен бөлісті.
Бұл отырыс жас мамандарды кәсіби шыңдауға бағытталған іс-шаралар мен тәлімгерлік институтының рөлін айқындай түскен маңызды қадам болды.
