Атыраулық полицейлер бейнекамералар көмегімен 14 мыңға жуық құқық бұзушылық анықтады, – деп хабарлайды Polisia.kz.
– Жедел басқару орталығының қызметі бір секундқа да тоқтамайды. Барлық жедел ақпарат осында келіп түседі. Атырау қаласының аумағында 759 бейнебақылау камерасы орнатылған. Осы жүйенің көмегімен қылмыстық және әкімшілік құқық бұзушылықтарды анықтау және ашу арқылы қоғамдық тәртіпті қорғау жүзеге асырылады, – деді Атырау облысы Полиция департаментінің бастығы Қамза Үмбетқалиев.
– Мәселен, қазір бейнебақылау жүйесін тиімді пайдалана отырып, 300 астам қылмыс және 13 839 әкімшілік құқық бұзушылық анықталды. Қылмыстардың ішінде ұрлық, ұсақ ұрлық, бұзақылық сияқты қылмыстар бар. Сонымен қатар, бейнебақылау камераларымен анықтайтын әкімшілік құқық бұзушылықтардың бірі – алкогольдік ішімдіктерді пайдаланған күйде көлік тізгіндеу немесе көшеде, қоғамдық орындарда мас күйінде болу, темекі тұқылдарын, тұрмыстық қоқыстарды тастау, – дейді Жедел басқару орталығының бастығы Асқар Атамкулов.
Одан басқа, жыл басынан Жедел басқару орталығының бейнебақылау камераларымен жол жүру ережелерін бұзған 10 мыңнан астам жүргізуші, ұсақ бұзақылық фактілері бойынша 3 606 адам анықталып, барлық құқық бұзушылар әкімшілік жауапкершілікке тартылды.
