Атырауда Конституция күніне орай пробация есебіндегілер арасында футбол турнирі өтті, - деп хабарлайды Polisia.kz.
"Заң мен тәртіп" қағидасы аясында 30 тамыз – Қазақстан Республикасының Конституциясы күніне орай Атырау қалалық пробация қызметінің ұйымдастыруымен жастар арасында шағын футболдан турнир өткізілді.
Жарыс 28 тамыз күні өтіп, оған пробация қызметінің есебінде тұрған 30-дан астам азамат қатысып, 4 командаға бөлініп бақ сынады. Турнир қорытындысы бойынша жеңімпаздар мен жүлдегерлер Бұқаралық спортты дамыту клубы тарапынан медальдармен және алғыс хаттармен марапатталды. Сондай-ақ үздік ойыншы мен үздік қақпашы номинациялары бойынша да арнайы марапаттар табысталды.
Шара барысында бөлім бастығы Мейірбек Уразғалиев сөз сөйлеп, турнирдің маңыздылығын атап өтті:
– Спорт – денсаулық кепілі. Біз мұндай жарыстарды үнемі ұйымдастырып келеміз. Басты мақсатымыз – қайталама қылмыстың алдын алу және жастар арасында салауатты өмір салтын насихаттау. Әр спорттық іс-шара сайын қатысушылар санының артып келе жатқаны бізді қуантады, – деді ол.
