Атырауда тәртіп сақшылары қалың тұман кезінде 1000-нан астам көлікті сүйемелдеп жөнелтті, – деп хабарлайды Polisia.kz.
13-14 қаңтар күндері Атырау облысында қалың тұман түсіп, жол қозғалысының қауіпсіздігіне айтарлықтай кедергі келтірді. 13 қаңтар күні түнде республикалық маңызы бар Атырау – Орал және Атырау – Астрахань тасжолдарында көктайғақ болып, қозғалыс шектелді.
Қиын жағдайға тап болған 1000-нан астам көлікті патрульдік полиция қызметкерлері сүйемелдеп, жол бойынан қауіпсіз орындарға жеткізді. Қолайсыз ауа райы кезінде жол-көлік оқиғаларының алдын алу мақсатында полиция қызметкерлері тәулік бойы түсіндіру жұмыстарын жүргізіп, жүргізушілерге қажетті кеңестер беруде.
Құрметті көлік жүргізушілері! Жолға шықпас бұрын көлігіңіздің техникалық жағдайын мұқият тексеріңіз. Сонымен қатар, 112 арнасы арқылы жолданатын ауа райы туралы ескертпелерге ерекше назар аударуды ұмытпаңыз. Қауіпсіздік – барлығымыз үшін маңызды!
