Атырауда полицияның қатысуымен мерекелік концерт өтті, - деп хабарлайды Polisia.kz.
Атырау қаласында полиция күніне орай Сұлтан Бейбарыс алаңында "Қоғам қауіпсіздігі – басты міндет" атты мерекелік концерт ұйымдастырылды. Іс-шара тәртіп сақшыларының қоғам тыныштығын күзетудегі еңбегін құрметтеу және қала тұрғындары арасында патриотизм мен бірлікті арттыру мақсатында өтті.
Мерекелік кеште Атырау облысы полиция департаментінің көркемөнерпаздар тобы өздерінің өнерлерін ортаға салды. Концерт барысында патриоттық әндер шырқалып, музыкалық қойылымдар мен би нөмірлері орындалып, көрермендердің зор ықыласына бөленді.
Аталған шараға қала тұрғындары мен қонақтары көптеп жиналды. Қоғам өкілдері полиция қызметкерлерінің қоғам алдындағы жауапкершілігі мен қажырлы еңбегіне алғыс білдіріп, жылы лебіздерін жеткізді. Кеш көңілді әрі есте қаларлықтай өтті.
Сонымен қатар алаңда балалар мен жасөспірімдерге арналған ойын-сауық бағдарламалары ұйымдастырылып, мерекелік көңіл-күйді одан әрі арттырды.
Осындай қоғамдық іс-шаралар азаматтар мен құқық қорғау органдары арасындағы сенімді нығайтып, қоғамдағы қауіпсіздік пен тұрақтылықты сақтау жолындағы бірлескен жауапкершілікті түсінуге ықпал етеді.
