Атырау облысы полицейлерінің ұйымдастыруымен профилактикалық мақсатта "Мен және әкем" тақырыбында спорттық іс-шара өтті, - деп хабарлайды Polisia.kz.
26 маусым – Халықаралық нашақорлыққа қарсы күрес және 18 маусым – Халықаралық әкелер күніне орай, Атырау Көлік және коммуникациялар колледжінің студенттері арасында "Мен және әкем" тақырыбында спорттық сайыс өтті.
Іс-шараның мақсаты – әке мен бала арасындағы отбасылық қарым-қатынасты нығайту, салуатты өмір салтын насихаттау, бұқаралық спортты дамыту және есірткіге қарсы иммунитетті қалыптастыру.
Аталған іс-шараға Атырау облысы ПД есірткі қылмысына қарсы іс-қимыл басқармасының аға жедел уәкілі Марьяна Джангалиева, Атырау облысы білім беру басқармасының әдіскері Қуаныш Шариполлаев пен "Bagdat Food" компаниясының өкілі Дильназ Рахманова арнайы шақырылып, отбасылық 6 команда ойынын тамашалады.
Спорттық сайыстың нәтижесі бойынша бірінші орынды ГЭС-23 тобы иеленді, екінші орынды АШ-23 тобы алса, үшінші орынды АК-23 тобы қанжығаға байлады.
Барлық командалар грамоталармен, алғысхаттармен және "Bagdat Food" компаниясының "фирмалық комбо" сертификатымен және естелік сыйлықтармен марапатталды.
