Атырауда үздік тергеушілер марапатталды, - деп хабарлайды Polisia.kz.
Қоғам қауіпсіздігін қамтамасыз етіп, қылмыстың бетін ашуда аянбай тер төгетін тергеушілердің еңбегі – ел тыныштығының кепілі. Ішкі істер органдарындағы аса жауапты және маңызды құрылымдардың бірі – тергеу қызметіне биыл 62 жыл толып отыр. Осыған орай Атырау облысы полиция департаментінде салтанатты жиын ұйымдастырылып, кәсіби мерекені лайықты деңгейде атап өтті.
Мерекелік іс-шара барысында қызметтік міндетін мінсіз атқарып, қоғамдық тәртіпті сақтау мен қылмысқа қарсы күрес жолында ерекше көзге түскен үздік тергеушілер марапат төрінен көрінді.
Атап айтқанда, Қазақстан Республикасы Ішкі істер министрі Ержан Саденовтың бұйрығымен Айнұр Теміржанова "Құқық тәртібін қамтамасыз етуге қосқан үлесі үшін" медалімен марапатталды. Атырау қалалық полиция басқармасының тергеу бөлімінің аға тергеушісі Гаухар Шайхишева ҚР Ішкі істер министрінің Құрмет грамотасына ие болса, Исатай аудандық полиция бөлімінің тергеу бөлімшесінің аға тергеушісі Думан Нұрмұханбетовке министрдің алғыс хаты табысталды.
Сондай-ақ №1 қалалық полиция бөлімінің тергеу бөлімшесінің аға тергеушісі Шынаргүл Хамзинаға полиция подполковнигі арнаулы атағы берілді.
Марапат иелеріне жылы лебізін білдірген Атырау облысы ролиция департаментінің басшылығы тергеушілердің кәсібилігі мен табандылығы, адалдығы мен іскерлігі қоғамның тыныштығын сақтауда маңызды рөл атқаратынын ерекше атап өтті.
Бұл – ел тыныштығы жолында қалтқысыз қызмет етіп жүрген тарлан тергеушілерге деген шынайы құрметтің бір көрінісі.
