Ақтөбе облысының полицейлері автокөліктерден ұрлық жасап жүрген күдіктіні ұстады, – деп хабарлайды Polisia.kz.
34 жастағы ақтөбелік сауда үйлерінің жанында автотұрақтардағы автокөліктерден ұрлық жасаумен айналысқан. Ер адам автокөлік салонындағы барсеткалар, сөмкелер және құнды заттарды ұрлаған. Бұл ретте ол сканерлеу құрылғысын пайдаланып, көліктердің дабылын өшіріп отырған.
Полиция қызметкерлері жедел іс-шаралар жүргізу барысында аталған күдіктіні Ақтөбе қаласында көшедегі автотұрақта тұрған көліктен 1 млн теңгеден астам ақшаны ұрлаған кезде «ізін суытпай» ұстады.
Ұсталған адам осындай жолмен алты ұрлық жасағанын мойындады, жалпы шығын көлемі үш миллион теңгеден асады.
Ұрлық фактілері бойынша сотқа дейінгі тергеп-тексеру жүргізілуде. Күдікті уақытша ұстау изоляторына қамалды.
