Аягөзде аязда жолда қалған Моңғолия жолаушыларына полиция қызметкерлері көмек қолын созды, – деп хабарлайды Polisia.kz.
Алматы – Өскемен тас жолындағы қатты боран салдарынан Моңғолиядан Алматыға бағыт алған жолаушылар автобусы Аягөз қаласында аялдауға мәжбүр болды. Автобуста 23 жолаушы, оның ішінде 19 моңғолиялық және 4 қазақстандық азамат болған. Олардың бірі кәмелетке толмаған жасөспірім. Қала полицейлері жолда қалған адамдарға көмек көрсетіп, спорт мектебінде орналасқан жылыту пунктінен жайлы орын ұсынды. Алайда жолаушылар автобус ішінде қалуды құп көрді.
Суықта қауіпсіздікті сақтау мақсатында автобус жанында кезекшілік атқарып, көмек көрсетуге дайын полиция бекеті орнатылды. Құқық қорғау қызметкерлері қолайсыз ауа райы жағдайында жедел әрекет етіп, жолаушыларға сенімділік пен қауіпсіздік сезімін сыйлады.
Сондай-ақ Үржар ауданында трассада да полицейлер автобус жолаушыларына көмек көрсетті.
Ауа райының қолайсыздығына байланысты Алматыдан шыққан тағы бір автобус Алматы – Семей тасжолында Үржар ауданында тоқтауға мәжбүр болды. Аталмыш аумақта қызмет атқарып жүрген полицейлер жедел әрекет етіп, екі жүргізуші мен 38 жолаушыны Таскескен ауылындағы мешіт базасында ұйымдастырылған жылыту пунктіне жеткізді.
Полицияның уақытылы көрсеткен көмегінің арқасында жолаушылар жылынуға және демалуға мүмкіндік алып, қолайсыз жағдайда сапарын жалғастырудан туындайтын қауіп-қатерден сақтандырылды.
