Аягөзде жастардың қауіпсіздігін қамтамасыз ету мақсатында профилактикалық рейд өтті, - деп хабарлайды Polisia.kz.
Аягөз ауданы полиция бөлімі, Аягөз ауданы әкімдігінің “Жастар ресурстық” орталығы және Аягөз аудандық білім бөлімі бірлесіп жастардың қауіпсіздігін қамтамасыз ету үшін профилактикалық рейд өткізді.
Іс-шараның басты мақсаты — кәмелетке толмаған жасөспірімдердің түнгі уақытта ата-анасының немесе заңды өкілдерінің ертуінсіз көшеде жүруіне жол берілмейтінін еске салу болды. Бұл профилактикалық шара құқық бұзушылықтардың алдын алуға, кәмелетке толмағандардың құқықтарын қорғауға және жастар арасында жауапкершілік мәдениетін қалыптастыруға бағытталған.
Рейд барысында полицейлер жасөспірімдермен түсіндіру жұмыстарын жүргізіп, сақталуы тиіс ережелер туралы айтып, балалардың тәртібі үшін ата-аналардың жауапкершілігін еске салды. Сондай-ақ қоғамның өсіп келе жатқан ұрпақтың әл-ауқатын қамтамасыз етудегі рөліне де назар аударылды.
Бұл шара жастар арасында құқықтық сауаттылықты арттыруға және олардың қауіпсіздігін қамтамасыз етуге бағытталған маңызды қадам болып табылады. Аягөз ауданында мұндай рейдтер жалғасады және жастарға арналған қауіпсіз орта қалыптастыруға мүмкіндік береді.
