Жаркентте тәртіп сақшылар әлеуметтік аз қамтылған және көпбалалы отбасыларға көмек көрсетті, – деп хабарлайды Polisia.kz.
Панфилов ауданының полицейлері мемлекет Басшысының үндеуін қолдап, Жаркент қаласындағы әлеуметтік аз қамтылған және көпбалалы отбасыларға көмек көрсетті.
«Жеке құрамнан төтенше жағдайға байланысты күн-көрісі нашар және көпбалалы отбасыларға жәрдем беру туралы ұсыныс түсті. Бүгін бірнеше көпбалалы және әлеуметтік жағдайы қиын отбасыларға көмек көрсеттік. Оларға азық-түлік жеткізілді. Қашықтан оқыту жүйесі енгізілгендіктен жағдайы төмен отбасының мектеп жасындағы жасөспіріміне смартфон табыс етілді. Қиын шақта қолдау көрсеткен аудандық полицияның жеке құрамына ризашылығымды білдіремін. Игі шараны қолдан келгенше жалғастырамыз»,- деді Панфилов АПБ басшысының орынбасары Жамбыл Бакетов.
Сондай-ақ, қоғамның белсенді өкілдері, кәсіпкерлер мен блогерлер тарапынан да санитарлық шараларды қамтамасыз ету мақсатында құрылған бекеттердегі полицейлер мен медицина қызметкерлеріне алғыстарын айтып, сый-құрмет көрсету деректері кездеседі.
Текелі қаласының жас кәсіпкері мен жергілікті блогері қала аумағының санитарлық күзетінде тұрған бекеттегі қызметкерлерге тұрғындар атынан алғыстарын айтып, пиццаларды және сусындарды табыстады.
Тәртіп сақшылары індетті жеңу үшін әрбір адам сақтық шараларына үлкен жауапкершілікпен қарауы қажет екенін ескертеді. Облыстағы сақтық шараларына түсіністікпен қарап, қоғамдық орындарда бетпердесіз жүрмеуге шақырады.
