Балқаш қаласының полицейлері дүкенге тауар әкеліп тұрған автокөліктен екі қап орамжапырақ пен бір жәшік жүзім ұрлаған азаматты ұстады, – деп хабарлайды Polisia.kz.
1 қараша күні Қарағанды облысы Балқаш қалалық полиция бөліміне қаладағы дүкендердің бірінде сатушы болып істейтін 26 жастағы азаматша хабарласып, дүкенге азық-түлік тиелген автокөліктің келгенін, жүк түсіру барысында белгісіз біреудің жүк көлігінен екі қап орамжапырақ пен бір жәшік жүзім ұрлап кеткенін айтқан.
Келтірілген шығын көлемі 22 мың теңгені құраған.
Полиция қызметкерлері жедел-іздестіру іс-шараларын өткізу барысында осы іске қатысы бар деген күдікпен 31 жастағы азаматты ұстады. Ол қылмысын мойындады.
Аталған факт бойынша Қазақстан Республикасы Қылмыстық кодексінің 188-бабына (Ұрлық) сәйкес қылмыстық іс қозғалып, тергеу амалдары жүргізілуде.
