Балқашта тұрғыннан 1 миллион теңге ұрлаған ер адам ұсталды, – деп хабарлайды Polisia.kz.
12 тамызда Қарағанды облысының Балқаш қаласы полиция бөліміне 42 жастағы қала тұрғынынан арыз түсті. Белгісіз біреу жәбірленушіге тиесілі 1 миллион теңге ақшаны ұрлап кеткен. Жәбірленуші танысының үйіне барып, сәлден соң екеуі сыртқа шыққан. Үй иесі пәтердің сыртқы есігін кілттеуді ұмытып кеткен. Осы сәтті ұтымды пайдаланған белгісіз біреу пәтерге кіріп, 1 миллион теңге салынған сөмкені алып кеткен. ҚР ҚК-нің 188-бабы (Ұрлық) бойынша қылмыстық іс қозғалды.
26 тамызда жедел-іздестіру іс-шарасы аясында криминалды полиция қызметкерлері күдікті – 31 жастағы ер адамды ұстады. Ұсталған адам қылмысын мойындап, ұрланған ақшаның көп мөлшерін жұмсап жібергенін түсіндірді. Полиция қызметкерлері қалған 200 мың теңгені тәркілеп, тергеу жұмыстарын жалғастыруда.
