БҚО-да полиция көлікті мас күйде тізгіндемек болған жүргізушіні анықтады, — деп хабарлайды Polisia.kz.
28 наурызға қараған түні жедел басқару орталығының инспекторлары камера арқылы ішімдік ішкен ер адам көлігіне жақындап, рульге отырмақшы болғанын байқаған. Осыған орай олар жедел әрекет етіп, оған заңды бұзуға және жолдағы қауіпсіздікке қауіп төндіруге мүмкіндік бермеу мақсатында патрульдік полиция қызметкерлеріне хабарлайды. Хабарламаны алған патрульдік полиция қызметкерлері дереу сол жерге барып, заң бұзушылықтың алдын алды. Нәтижесінде LADA Largus автокөлігі тоқтатылып, 43 жастағы ер адам ұсталды. Медициналық куәландыруға сәйкес ол орта дәрежелі мас күйде болғаны анықталды. Сонымен қатар бұл жүргізуші көлік құралын басқару құқығынан 2023 жылдың тамызында 7 жылға айырылғаны белгілі болды, бірақ сот шешіміне қарамастан, ол заңды елемеуді жалғастырған.
Мұндай әрекеттер жүргізушінің өзі үшін ғана емес, жол қозғалысының барлық қатысушылары үшін де қауіпті. Қазіргі уақытта осы факті бойынша сотқа дейінгі тергеу басталды. Автокөлік арнайы автотұраққа қойылды. Бұл жағдай жол қозғалысы ережелерін сақтаудың және жолдағы жауапкершіліктің маңыздылығын тағы бір рет еске салады.
Қала тұрғындарының қауіпсіздігі полицияның мұқият бақылауында.
