БҚО-ның Бөрлі ауданында пробация қызметі ашық сот отырысын өткізді, - деп хабарлайды Polisia.kz.
Бөрлі аудандық пробация қызметі құқық бұзушылықтардың алдын алу және есепте тұрған сотталғандардың заң талаптарын сақтауын қамтамасыз ету мақсатында ашық сот отырысын ұйымдастырды.
Отырыста «Ж» есімді сотталғанға қатысты бас бостандығын шектеу жазасының өтелмеген бөлігін бас бостандығынан айыру жазасына ауыстыру туралы пробация қызметінің ұсынысы қаралды. Сотталған азамат жазасын өтеу барысында бірнеше рет өрескел құқық бұзушылықтарға жол беріп, сот жүктеген міндеттер мен талаптарды орындамаған.
Батыс Қазақстан облысы Бөрлі аудандық сотының қаулысымен пробация қызметінің ұсынысы қанағаттандырылып, «Ж» есімді сотталғанның жаза түрі бас бостандығынан айыруға ауыстырылды.
Ашық сот отырысының басты мақсаты – есепте тұрған сотталғандарға құқық бұзушылықтың салдарын нақты көрсету арқылы оларды заң бұзушылықтан сақтандыру және жауапкершілікті сезіндіру. Пробация қызметі мұндай шаралардың сотталғандарға тәлім беріп, қайта қателікке жол бермеуге ықпал ететініне сенім білдіреді.
