Батыс Қазақстан облысының аумағында балық пен балық өнімдерінің заңсыз өндірілуі мен айналымын анықтауға, алдын алуға және жолын кесуге бағытталған кең ауқымды науқан өткізіліп жатыр, – деп хабарлайды Polisia.kz.
«Бекіре-2023» жедел-профилактикалық іс-шараның барысында ҚР ӘҚБтК-нің 383-бабы (Балық аулау және балық ресурстары мен басқа да су жануарларын қорғау қағидаларын бұзу) бойынша 45 адам жауапқа тартылды. Олардың тарапынан келтірілген айыппұлдардың жалпы сомасы 776 250 теңгені құрады.
Балық ресурстарын, басқа да су жануарларын немесе өсімдіктерін заңсыз өндіру фактісі бойынша ҚР ҚК-нің 335-бабы 1-бөлігіне (Балық ресурстарын, басқа да су жануарларын немесе өсiмдiктерін заңсыз алу) сәйкес 8 дерек бойынша сотқа дейінгі тергеу амалдары басталды.
– БҚО, Ақжайық ауданы, Жаңабұлақ ауылдық округінің Бітік су қоймасының жанында 1947 жылғы азаматтың басқаруындағы Toyota Rav-4 автокөлігі тексерілді. Орал қаласының тұрғыны тиісті құжаттарсыз жартылай тұқымды балықты тасымалдаған. Полиция қызметкерлері резеңке қайық пен торлармен араласқан 8 қап балықты тәркіледі.
БҚО Ақжайық ауданы Шабдаржап ауылының маңында, Жайық өзенінде заңсыз балық аулау күдігі бойынша 35 және 34 жастағы екі азамат ұсталды. Олардан үш балық аулау құралы, ағаш қайық, 14 қап жартылай балық тәркіленді.
