Ақтөбе қаласының дәмханаларының бірінде төбелес болып, ер адам пышақ жарақатын алды, – деп хабарлайды Polisia.kz.
Көңіл көтеру орындарының жұмысына байланысты енгізілген шектеу шараларына қарамастан, облыстың бас санитарлық дәрігерінің қаулысын елемеу деректері орын алып жатыр.
7 қаңтар күні сағат 02.25-те Ақтөбе қаласы ПБ ЖБО «102» телефонына Краснощеков көшесінде «Самовар» кафесінің жанында 37 жастағы ер адам пышақ жарақатынан қаза тапқаны туралы хабарлама келіп түсті.
Криминалдық полиция қызметкерлері «ізін суытпай» жедел іс-шаралар жүргізу барысында 28 жастағы күдіктіні анықтап, ұстады.
Алдын ала тергеу барысында анықталғандай, «Самовар» дәмханадағы отырыстан кейін төбелес туындап, клиент жәбірленушіге пышақ жарақатын салған.
Аталған факті бойынша ҚР ҚК-нің 99-бабы (Адам өлтіру) бойынша сотқа дейінгі тергеу басталды. Күдікті Ақтөбе қаласының уақытша ұстау изоляторына қамалды.
Аталған дәмхананың әкімшілігі ойын-сауық мекемелерінің жұмыс режимі бойынша шектеу шараларын бұзды. Әкімшілікке қатысты материалдар жиналып, шешім қабылдау үшін сапаны бақылау және қызмет көрсету департаментіне жіберілді.
Осыған байланысты Ақтөбе облысы Полиция департаменті кәсіпкерлерді вирустық инфекцияны таратпау бойынша санитарлық және шектеу шараларын сақтауға шақырады.
