Алматы және Жетісу облыстары бойынша қылмыстық-атқару жүйесі департаментінің пробация қызметінде ер адамға ұсақ ұрлық жасағаны үшін тағайындалған қоғамдық жұмыстар түріндегі жазаны орындау аяқталды, - деп хабарлайды Polisia.kz.
Бұл оқиға көптеген адам үшін сабақ болып, тіпті ең шынайы сезімдер де заңды бұзуды ақтамайтынын еске салды. Дүкенде қымбат сыйлықты ұрлаған жас жігіттің мақсаты қыздың көңілін өзіне қарату болды. Алайда ол қылмыс орнында ұсталды. Сот кінәсін мойындау мен өкінуін ескере отырып, оған 80 сағаттық қоғамдық жұмыстарды тағайындады. Соттан кейін ер адам есепке тұру және қоғамдық жұмысты орындау орнын анықтау үшін аумақтық пробация қызметіне жіберілді.
Қолданыстағы заңнамаға сәйкес, қоғамдық жұмыстар сотталғандардың белгілі бір біліктілікті талап етпейтін тегін қоғамдық пайдалы жұмыстарды орындауын білдіреді. Пробация қызметінің қызметкерлері сотталушымен түсіндірме әңгіме өткізіп, оған жұмыстарды орындау ережелері мен кестесін түсіндірді. Оған қалалық саябақтардың бірінің аумағында қар тазалау жұмыстары, сондай-ақ қоғамдық кеңістіктерді абаттандыруға көмектесу тағайындалды.
- Мен өзімнің теріс қылықтарымның салдарын түсіндім, бұл мен үшін сабақ болды. Енді мен біреуді заңды бұзу арқылы таң қалдырғаннан гөрі, өз сезімдерім туралы ашық айту жақсы екенін білемін, - деді заң бұзған жігіт.
Пробация қызметкерлері сот жүктеген міндеттемелердің орындалуын және жаза орындау тәртібінің сақталуын бақылау үшін жұмыс орнына үнемі барып тұрды. Сондай-ақ сотталғанның барлық талапты бұлжытпай орындағаны айтылды.
- Мұндай жазалау шаралары қоғамға зиянды өтеп қана қоймай, адамдарға өздерінің өмірлік көзқарастарын қайта дұрыстауға көмектеседі. Бұл жағдай жазаның адамға өз қателіктерін түсінуге және өмірін жақсы жаққа өзгертуге көмектесетінінің үлгісі болады деп үміттенеміз, - деп атап өтті ҚАЖ департаментінің бастығы Рысбек Тұрғымбаев.
