Екібастұз полицейлері мектеп оқушыларына профилактикалық сабақ өткізді, – деп хабарлайды Polisia.kz.
Іс-шараға 9-11 сынып оқушылары қатысты, олардың мақсаты – заңға бағынатын мінез-құлық пен салауатты өмір салтын қалыптастыру, сондай-ақ кәмелетке толмағандар арасындағы қылмыстар мен әкімшілік құқық бұзушылықтардың алдын алу.
Әр оқу орнына бекітілген Екібастұз қаласы ПБ бөлімшелерінің бастықтары оқушылармен профилактикалық әңгімелер, дәрістер, сабақтар өткізді. Іс-шараны өткізу барысында оқушыларға өзекті және маңызды тақырыптар жеткізілді: ” Жаман әдеттерден аулақ болыңыз!”, “Абайлаңыз, вейпинг!”, “Жасөспірім және заң”, “Кәмелетке толмағандардың әкімшілік және қылмыстық жауапкершілігі”, “кәмелетке толмағандардың қатысуымен ЖКО”, “ЖКО себептері мен салдары”, “Терроризмге қарсы қауіпсіздік”, “Тұрмыстағы қауіпсіздік”. Сондай-ақ балаларға профилактикалық бейнероликтер көрсетіліп, ақпараттық жадынамалар мен буклеттер табыс етілді.
– Екібастұз қаласы полиция басқармасы бөлімшелерінің басшылары әр оқу орнында апта сайын осындай іс-шаралар өткізеді. Сонымен қатар полиция қызметкерлері олардың қауіпсіздігін қамтамасыз ету үшін оқу орындарын тексерді. Полиция қызметкерлері оқу орындарында орнатылған дабыл сигнализациясы жүйелерінің жарамдылығын, бейнебақылау камераларының жұмысын, объектілердің инженерлік-техникалық нығайтылуын тексерді, – деді Екібастұз қаласы ПБ бастығы Қайыржан Шақарғалиев.
