Күзгі-қысқы кезеңнің келуімен Екібастұз қаласы полиция басқармасының жол-техникалық инспекциясы тобы қаладағы ұйымдар мен мекемелердің көлік құралдары мен техникаларын климаттық жағдайларға дайындығын тексеруді бастады, – деп хабарлайды Polisia.kz.
“Диас-Дар” ЖШС аумағында жүргізілген тексеріс барысында полицейлер көліктердің қысқы дөңгелектерінің жағдайына, салқындатқыш сұйықтықтың деңгейіне, аккумуляторлардың жарамдылығына және салондардың жылыту жүйелерінің дұрыстығына ерекше назар аударды. Автомобильдердің негізгі жүйелерінің жұмысы мұқият бағаланып, олардың тайғақ жолдар мен нашар көріну жағдайларында қауіпсіз қозғалысты қамтамасыз етуге қабілеттілігі тексерілді.
Полиция қызметкерлері көліктердің техникалық сипаттамаларын ғана емес, төтенше жағдайларда қажетті қысқы жабдықтардың бар-жоғын да назарға алды. Атап айтқанда, жол қозғалысы ережелеріне сәйкес, көліктерде медициналық қобдиша, өрт сөндіргіш, ескерту үшбұрышы, шағылыстыратын кеудеше, арқан, күрек және басқа да құрал-жабдықтардың болуы тексерілді. Анықталған ұсақ бұзушылықтар сол жерде жойылып, жүргізушілерге кемшіліктерді түзету бойынша ұсыныстар берілді.
Сонымен қатар полиция жүргізушілердің көлік басқару құқығына қатысты құжаттарын тексеріп, қала мен өңір көшелерінде арнайы техниканы қолдану арқылы жол-көлік оқиғаларының алдын алу мақсатында профилактикалық әңгімелер жүргізді.
– Бұл шаралардың басты мақсаты – көлік қозғалысы кезінде қауіпсіздікті қамтамасыз ету, – деп атап өтті Екібастұз қаласы ПБ әкімшілік полиция бөлімінің бастығы Нұрғазы Жәмшитов.
