Екібастұз қаласындағы №11 мектептің 8-10 сынып оқушылары Павлодар облысы полиция басқармасына экскурсия жасап, құқық қорғау қызметімен жақынырақ танысты, - деп хабарлайды Polisia.kz.
Қонақтарды басқарма бастығы Төлеген Құдайбергенов қарсы алып, қоғамдық орындарда өзін ұстау ережелері, жолдағы қауіпсіздік және интернеттегі қауіпсіздік мәселелері туралы әңгіме өрбітті. Сонымен қатар оқушылардың сүйікті пәндері, болашақ мамандықтары жөнінде пікір алмасып, полиция қызметіне қалай түсуге болатыны туралы сұрақтарына жауап берді. Балалар талап етілетін балл саны мен спорттық дайындық туралы қызыға сұрап, өздерінің алдағы жоспарларымен бөлісті.
Оқушылар полиция басқармасындағы мұражайды тамашалады. Мұражайдың тарихымен ардагерлер кеңесінің төрағасы Бибігүл Исаева таныстырып, оның жас ұрпақты тәртіп пен қауіпсіздік күзетінде тұрған полицей мамандығына құрметпен қарауға тәрбиелеудегі маңыздылығын атап өтті. Балалар мұражай сөрелерінен құқық қорғау органдарының даңқты дәстүрлері мен қызмет күндерін бейнелейтін құжаттар, құрал-жабдықтар, кітаптар мен рациялар секілді тарихи жәдігерлерді қызығушылықпен тамашалады.
Криминалистер бөліміне бару балалар үшін ерекше әсер қалдырды. Тәртіп сақшылары криминалистік құрал-жабдықтардың жұмыс принциптері мен олардың күнделікті істердегі маңызын көрсетті. Балалар дактилоскопиялық сканер мен криминалистің арнайы чемоданымен танысып, оның ішіндегі құралдарды қолдану тәсілдерін үйренді. Полицейлер балалардың қойған сұрақтарына толық жауап беріп, өз жұмыстарының күрделілігі мен жауапкершілігін түсіндірді.
Экскурсия соңында оқушылар көрген-білгендері үшін алғыс айтып, полиция қызметінің маңызды әрі жауапты екенін терең түсінгендерін жеткізді. Қызықты кездесу мен мазмұнды әңгіме олардың болашақ мамандық таңдауларына әсер етері сөзсіз.
