Елордада автокөліктен құрал-саймандар ұрлаған күдікті ұсталды, - деп хабарлайды Polisia.kz.
Елорда тұрғыны көлігінен құрал-саймандардың ұрланғаны туралы полицияға арызданды. 38 жастағы азаматтың айтуынша, көлігінде болған аккумулятор мен өзге де құралдар қолды болып, оған келтірілген материалдық шығын 300 мың теңгені құраған.
Полицейлер ұрлықтың мән-жайын анықтау барысында автокөлік иесінің көпқабатты үйдің ауласына қойған көлігінің артқы есіктерін жабуды және дабыл құрылғысын қосуды ұмытып кеткенін анықтады. Құқық қорғау органдары оқиға орнында қылмыскердің іздерін тауып, куәгерлерден сауалнама алып, жедел-іздестіру шараларын жүргізді.
Нәтижесінде Алматы ауданының криминалдық полиция қызметкерлері күдіктіні қолға түсірді. 38 жастағы ер адам Acura MDX автокөлігінің жүксалғышынан аккумулятор мен өзге де құралдарды ұрлап кеткенін мойындады. Оның айтуынша, көліктің артқы есіктерінің құлыпталмағанын және дабыл құрылғысының істемей тұрғанын байқап, бөтеннің мүлкін иемдену үшін қылмыстық ниеті туындаған. Ұрланған заттарды сатып, пайдасын өз қажетіне жаратпақ болған. Алайда полицияның жедел әрекетінің арқасында күдіктінің жоспары жүзеге аспай, ұрланған заттар тәркіленді.
Аталған факті бойынша қылмыстық іс қозғалып, күдікті уақытша ұстау изоляторына қамалды.
