Елордада кальянды заңсыз пайдаланған азаматтар анықталды, - деп хабарлайды Polisia.kz.
Астана қаласында полиция департаменті мен жергілікті атқарушы органдардың бірлескен рейдтік іс-шаралары барысында кальянды заңсыз пайдалануға қатысты бірқатар фактілер тіркелді. Жыл басынан бері елордада 6 мыңнан астам құқық бұзушы анықталды.
Шараның негізгі мақсаты – кәмелетке толмағандардың денсаулығын қорғау, сондай-ақ темекі өнімдері мен кальянды тұтынуға қатысты заң талаптарының орындалуын қадағалау.
Тексеру барысында қала аумағындағы дәмханалар мен мейрамханалардың кейбірінде құқық бұзушылықтар орын алғаны белгілі болды. Сарыарқа ауданында орналасқан дәмханада кальян ашық залда келушілерге ұсынылған. Бұл ретте темекі өнімдерін тұтынуға тыйым салынған қоғамдық орындарда кальян қолдану фактісі тіркелді. Сонымен қатар Алматы ауданында орналасқан бір қоғамдық тамақтану орнында кальянға арналған бөлме санитарлық талаптарға сәйкес жабдықталмағаны белгілі болды.
Аталған құқық бұзушылықтар бойынша ҚР ӘҚБтК-нің 441-бабына сәйкес хаттамалар толтырылды.
Полиция қызметкерлері кальян шегудің денсаулыққа зиянын ескертеді және кәсіпкерлік субъектілерін заң талаптарын қатаң сақтауға шақырады. Сондай-ақ ата-аналарға балалардың бос уақытын бақылап, олардың зиянды әдеттерден алшақ болуына назар аудару ұсынылады.
