Павлодар полициясы есірткі қылмыстарына қатысты заңнамалық өзгерістерді түсіндірді, – деп хабарлайды Polisia.kz.
Павлодар облысының Өңірлік коммуникациялар қызметінде есірткі қылмысы үшін қылмыстық жауапкершілік саласындағы заңнамалық өзгерістерге арналған брифинг өтті. Бұл шарада полиция департаментінің есірткі қылмысына қарсы іс-қимыл басқармасының бөлім бастығы Ирина Тимиргалиева заңға енгізілген түзетулер жайында жан-жақты баяндады.
Спикердің айтуынша, жаңа заң есірткі бизнесін ұйымдастырушылар мен курьерлердің жауапкершілігін нақты ажыратып берді. Мысалы енді есірткі тасымалдаушыларға 5 жылдан 8 жылға дейін бас бостандығынан айыру жазасы қарастырылған. Бұрынғы заңнама бойынша есірткі немесе психотроптық заттарды заңсыз дайындау, сақтау, тасымалдау және сату мақсатында әрекет еткендерге ең көп дегенде 10 жыл жаза тағайындалатын. Ал есірткіні ірі көлемде өткізгендерге қатысты жаза мерзімі бұрын 12 жылға дейін болса, қазір бұл көрсеткіш 6 жылдан 10 жылға дейін қысқарды.
Сонымен қатар құрамында есірткі бар өсімдіктерді ірі көлемде заңсыз өсіргендер үшін де жауапкершілік күшейтілді. Енді бұл қылмыс үшін 7 жылдан 12 жылға дейін бас бостандығынан айыру және мүлкін тәркілеу жазасы көзделген.
Ирина Тимиргалиева жасалған өзгерістердің кейбір топтар үшін жаңа өмір бастауына мүмкіндік беретінін ерекше атап өтті. Әсіресе, есірткіні тасымалдаумен айналысқан жастарға ертерек бостандыққа шығып, түзелу жолына түсуге жағдай жасалмақ. Бұл өзгеріс тек қана қылмыскерлердің жазасын жеңілдету емес, сонымен қатар қоғамдағы тюремдік жазаның үлесін азайтуға бағытталған маңызды қадам болып отыр.
Заңға енгізілген түзетулерге сәйкес, оның кері күші де бар. Осы баптар бойынша сотталған азаматтар жазаның бір бөлігін өтеуді шартты түрде мерзімінен бұрын босатуға немесе жаза түрін жеңілірекке ауыстыруға өтініш білдіре алады. Әрбір іс жеке қаралатын болады. Алдын ала мәліметтер бойынша, бұл мүмкіндікті мыңнан астам қазақстандық пайдалана алады.
Спикердің мәліметінше, өткен жылы Павлодар облысында есірткі қылмысы үшін 50-ден астам адам ұсталған. Оның ішінде үш кәмелетке толмаған азамат бар. Бұл деректер есірткі қылмысымен күрестің әлі де өзекті мәселе екенін көрсетеді.
Енгізілген заңнамалық өзгерістердің негізгі мақсаты – қылмыскерлерді жазаға тарту ғана емес, сонымен қатар қоғамдағы есірткіге қарсы мәдениетті қалыптастыру және жастардың бұрыс жолға түсуіне тосқауыл болу.
