БАҚ қызметкерлері күніне орай полиция ведомствосында ішкі істер органдарының баспасөз қызметі мен медиа-орталығының қызметкерлері марапатталды, – деп хабарлайды Polisia.kz сайтының тілшісі.
Шараға ақпарат және қоғамдық даму министрі Дархан Қыдырәлі мен тәуелсіз Қазақстанда жарыққа шыққан «Сақшы» газетінің бірінші бас редакторы марқұм Базарбай Исаевтың жары Құлан Ысқақова қатысты.
Сондай-ақ кездесуге онлайн-форматта аумақтық полиция бөліністерінің бастықтары мен өңірлік баспасөз қызметтерінің жетекшілері қосылды.
– Қауіпсіздік кепілі – полиция туралы жазып, көрсетіп, қызметкерлердің ерен еңбегін жұртқа паш етіп жүрген баспасөз қызметінің орнын ерекше атап өткен жөн. Аймақтағы жаңалықтармен бөлісіп, ведомствоның ашықтығын дәріптеп келе жатқан қаншама мамандар бар. Тәртіп сақшыларының имиджін қалыптастыратын да солар. Полиция бөліністерінің баспасөз хатшыларымен етене жақын жұмыс істеп, ішкі істер органдарының беделін арттыруға үлес қосып жүрген медиа-орталық ұжымын да атап өткім келеді, – деді Марат Ахметжанов.
Ақпарат және қоғамдық даму министрі Дархан Қыдырәлі ІІМ баспасөз қызметіне ақпарат берудегі жеделдігі мен кәсібилігі үшін алғысын білдірді.
Іс-шара барысында ақпараттық салада жұмыс істейтін бірқатар қызметкер «Ақпарат саласының үздігі» төсбелгісімен, грамоталармен және алғыс хаттармен марапатталды.
– Қазақтың қоғам қайраткері Міржақып Дулатов айтқандай: «Қай елдің баспасөзі мықты болса, сол елдің өзі де мықты». Баршаңызды кәсіби мерекемен шын жүректен құттықтаймын! Осындағы әрбіріңізге шығармашылық шабыт, толағай табыс тілеймін! – деді ІІМ басшысы.
Жиын соңында Марат Ахметжанов мерекеге орай Дархан Қыдырәліге «Құқық тәртібін қамтамасыз етуге қосқан үлесі үшін» медалін табыстап, «Серт» детектив шығармалар жинағын сыйға тартты.
Айта кетейік, ішкі істер органдарының жұмысы туралы баяндайтын «Сақшы» және «На страже» газеттеріне биыл 90 жыл.
