ІІМ-де нашақорлық пен есірткі қылмысына қарсы іс-қимыл мәселелері жөніндегі ведомствоаралық штабтың отырысы өтті

Қазақстан Республикасының Ішкі істер министрлігінде нашақорлық пен есірткі қылмысына қарсы іс-қимыл мәселелері жөніндегі ведомствоаралық штабтың отырысы өтті, - деп хабарлайды Polisia.kz.

Іс-шараға мемлекеттік органдардың басшылары, есірткі қылмысына қарсы іс-қимыл жөніндегі кеңестің, сондай-ақ денсаулық сақтау және оқу-ағарту министрліктерінің өкілдері мен аудан әкімдері онлайн форматта қатысты.

Отырыс ішкі істер министрінің бірінші орынбасары Бауыржан Аленовтың төрағалығымен өтті. Ол Мемлекет басшысының нашақорлық пен есірткі қылмысына қарсы күрес жөніндегі шараларды күшейтуге қатысты тапсырмаларын іске асыру тұрғысынан қаралатын мәселелердің өзектілігін атап өтті.

Отырыс барысында осы тапсырмаларды іске асырудың проблемалық аспектілері қаралды, сондай-ақ осы саладағы профилактикалық және құқық қорғау іс-шараларының тиімділігін арттыру жолдары талқыланды. Халықаралық нашақорлыққа қарсы күрес күніне — 26 маусымға орай есірткіге қарсы профилактикалық айлықты дайындау және өткізу мәселесіне ерекше назар аударылды.

Бауыржан Аленов халық арасында, әсіресе жастар арасында түсіндіру жұмыстарын жандандыру қажеттігін атап өтті. Ол жазғы демалыс кезінде жасөспірімдерді жұмыспен қамтуды есірткінің заңсыз айналымына байланысты заңсыз әрекеттерге тартудың алдын алудың негізгі факторларының бірі ретінде атап өтті.

Сондай-ақ отырыс шеңберінде есірткі қылмысына қарсы іс-қимылдың 2026-2028 жылдарға арналған кешенді жоспарын дайындаудың негізгі бағыттары мен ұсыныстары талқыланды. Қатысушылар ведомствоаралық өзара іс-қимылды күшейту, білім беру және ақпараттық-ағарту іс-шараларының тиімділігін арттыру бойынша нақты бастамалар көтерді.