ІІМ кеңесінің мүшелері Павлодар қаласының Жастар бастамаларын дамыту орталығында белсенділермен кездесті, - деп хабарлайды Polisia.kz.
Жасөспірімдер арасында есірткіні қолданудың проблемасы қоғам мен мемлекет тарапынан уақытылы ескерту мен белсенді шаралар қабылдауды талап етеді. Павлодар қаласында өткен кездесуде осы мәселе талқыланып, жастарды қорғау және нашақорлықтың алдын алу бойынша өзекті әлеуметтік шаралар қарастырылды.
Кездесу барысында синтетикалық есірткілердің жастар мен болашақ ұрпақтың әл-ауқатына келтіретін қауіпті зардаптарына ерекше назар аударылды. Қазақстан Республикасы ІІМ есірткі қылмысына қарсы іс-қимыл комитеті төрағасының орынбасары Қуандық Әлжанов қатысушыларға есірткіге қарсы іс-қимыл мәдениетін қалыптастырудың маңыздылығын түсіндіріп, жастарды салауатты өмір салтын ұстануға шақырды.
– Еліміздің болашағы – жастар. Сіздерде нашақорлыққа қарсы тұру және салауатты өмір салтын насихаттау мүмкіндігі бар. Есірткіге қарсы күресте әрқайсымыз жауапты екенімізді ұмытпайық. Біз сіздермен бірге нашақорлықтың таралуына тиімді қарсы тұра аламыз, - деді спикер.
Кездесу барысында қатысушылар есірткі заттарының адам өмірі мен болашағына әсерін, сондай-ақ жастарды есірткі айналымына тартудың себептері мен тетіктерін талқылады. Диалог ашық әрі жанды өтті. Блогерлер мен белсенділер өздерінің есірткіге қарсы жобаларын ұсынды, сұрақтар қойып, пікірлерімен бөлісті. Олар есірткінің қауіптері туралы хабардар болудың маңызды екенін атап өтті.
Кездесудің қорытындысы бойынша қатысушылар жастардың адамгершілік тәрбиесін арттыру, салауатты өмір салтын насихаттауға бағытталған құндылықтарды қалыптастыру қажеттілігін атап өтті.
