Қызылордада Жедел басқару орталығының бейнебақылау камерасы көмегімен автокөлік ұрлығын ашты, – деп хабарлайды Polisia.kz.
Сәуір айының 21 күні таңғы сағат 05:30 шамасында Қызылорда облысы Полиция департаментінің кезекші полицейі облыс орталығындағы көпқабатты үйлердің арасында орнатылған бейнекамерамен шолу барысында аулада тұрған екі автокөлік жанында жүрген күдік тудырған белгісіз азаматты байқайды. Кезекші дер кезінде байланыс құралына шығып, оқиға орнына патруль бекеттерін жібереді.
Тәртіп сақшыларының жедел әрекеттері нәтижесінде автокөліктерге ұрлыққа түсіп жатқан 25 жастағы күдікті Қызылорда қаласының тұрғыны ұсталып, қалалық Полиция басқармасына жеткізілді.
Қазіргі таңда орын алған дерек бойынша Қазақстан Республикасы Қылмыстық кодексінің 24-бабының 3-бөлігімен (Қылмыс жасауға тура бағытталған, тікелей пиғылмен жасалған әрекеттер (әрекетсіздік), егер бұл ретте қылмыс адамға байланысты емес мән-жайлар бойынша ақырына дейін жеткізілмеген болса, қылмысқа оқталу деп танылады) және 188-бабының 3-бөлігінің 3- тармағына (Ірі мөлшерде жасалған ұрлық, аса ірі мөлшерде жасалған ұрлық) сәйкес, сотқа дейінгі тергеп-тексеру амалдары жүргізілуде. Оқиғаның мән-жайлары анықталуда.
