Кентауда ұрлықтың 10 дерегіне қатысы бар жігіт қолға түсті, – деп хабарлайды Polisia.kz.
Кентау қалалық Полиция басқармасына бірнеше жергілікті тұрғын арызданған. Жәбірленушінің айтуынша, көше бойында орналасқан дүкенінің ішіне белгісіз тұлғалар сыртқы есігін сындырып, жасырын кіріп, спорттық киімдер мен балалар аяқ киімін ұрлап кеткен.
Келтірілген шығын – 370 мың теңгеге жуық.
Келесі тұрғын болса өз арызында түнгі уақытта белгісіз біреулердің дүкеніне кіріп, кассада тұрған 400 мың теңге ақшасын жымқырып кеткенін жазды. Үшінші тұрғын да осындай қылмыстың құрбаны болған. Бұл жолы ұры оның гаражына кіріп, автобөлшектерін ұрлап кеткен.
Полицейлер орын алған ұрлық қылмыстарын ашу мақсатында жедел-тергеу тобын құрды. Шұғыл әрекетке көшкен тәжірибелі тәртіп сақшылары қажетті шараларды іске асырды. Қылмысты ашып, күдіктіні ұстау мақсатында жедел-іздестіру шараларын жүргізді. Жинақталған ақпарат көздері нәтижесінде күдіктінің жеке басы анықталып, тұрғын-үйінен ұсталды. Оның бұрын сотты болғаны анықталды.
Содан сақшылар тексеру барысында күдіктінің жалпы 10 ұрлық жайтына қатысы барын айқындады. Ұрлаған бөтеннің мүліктерін сатып, ақшасын өз қажеттілігіне жаратып жіберген.
Күдікті қамауға алынып, ҚР ҚК-нің 188-бабы (Ұрлық) бойынша сотқа дейінгі тергеу амалдары жүргізілуде.
