Көлік полицейлері спорттық жарыстарда жоғары нәтижеге қол жеткізіп, жүлделі орындарға ие болды, – деп хабарлайды Polisia.kz.
Астана мен Қарағанды қалаларында өткен спорттық жарыстарда Көліктегі полиция департаментінің қызметкерлері кәсіби шеберліктерімен қатар, спорттық қабілеттерін де дәлелдеді. Жеңімпаздарды қабылдаған полиция полковнигі Мадияр Айтуғанов олардың жетістігін жоғары бағалап, алдағы жарыстарда да табыс тіледі.
Көліктегі полиция департаменті бастығының міндетін атқарушы Мадияр Айтуғанов спорттық жарыстарда жүлделі орындарға ие болған полицейлерді арнайы қабылдап, оларға жылы лебізін білдірді. Өз сөзінде Мадияр Айтуғанов әріптестерінің алдағы байрақты бәсекелерде де биік шыңдарды бағындыруына тілектестік білдіріп, жетістіктерін жоғары бағалады.
Еске сала кетейік, Астана қаласында классикалық пауэрлифтинг және зілтемірді жатып көтеруден ашық чемпионат өткен болатын. Аталған додаға Астана әуежайындағы желілік полиция бөлімінің бастығының орынбасары Асқар Жұмабеков қатысып, 93 келі салмақ дәрежесінде сынға түсті. Ол 165 келі салмақты еркін бағындырып, жатып көтеруден ІІ орынды иеленді және спорт шеберіне үміткер атағына лайық деп танылды.
Сонымен қатар Қарағанды қаласында өткен республикалық ауыр атлетика жарысында Жезқазған станциясындағы желілік полиция бөлімінің кезекші көмекшісі Алдияр Серікбаев та жоғары нәтиже көрсетті. 75 келі салмақ дәрежесінде 192,5 келіні белден жоғары көтеріп, ІІ орынды жеңіп алды. Жарыс қорытындысы бойынша оған І разряд атағы берілді.
Көліктегі полиция департаменті қызметкерлері тек қызметте ғана емес, спортта да өз шеберліктерін дәлелдеп келеді. Әріптестерімізді жарқын жеңістерімен шын жүректен құттықтаймыз! Алдағы уақытта да биік шыңдарды бағындыра беріңіздер!
