Жыл басынан бері Көліктегі ПД криминалистері 1600-ден астам оқиға орнын қарап, тексеру жүргізді, – деп хабарлайды Polisia.kz.
Ағымдағы жылдың басынан бері Көліктегі полиция департаментінің криминалистері 1610 оқиға орнын қарап, тексерді. Нәтижесінде 220 факт бойынша қол іздері, 83 факт бойынша трасологиялық іздер, 139-ы биологиялық шығу тегі және 35-і бойынша баллистикалық объектілер алынды. Алынған іздер мен объектілер бойынша криминалистер 400-ге жуық зерттеу жүргізді. Криминалистикалық есептер бойынша 144 оң нәтиже анықталды, оның ішінде 104 фактіде есептер қылмыстардың ашылуына ықпал етті. Бұл туралы Көліктегі ПД Жедел-криминалистикалық басқармасының бастығы Нұржан Жұмабеков айтты.
Оның айтуынша, бүгінгі таңда департамент криминалистері ең заманауи құралдармен, атап айтқанда, электронды-оптикалық аспаптар, cандық фото, аудио және бейне жабдықтар, компьютерлік жүйелер мен бағдарламалық кешендермен жұмыс істейді. Озық бағдарламалық кешендердің бірі – «Папилон» автоматтандырылған дактилоскопиялық ақпараттық-іздестіру жүйесі. Ол дактилоскопиялық карталардың электрондық дерекқорын және ашылмаған қылмыс орындарынан алынған қол іздерін құруды, сақтауды және пайдалануды қамтамасыз етеді.
– Қазірдің өзінде департаменттің 15 желілік бөлінісінде пилоттық жобада «Жеке тұлғаны биометриялық сәйкестендіру» жаңа автоматтандырылған дактилоскопиялық жүйесі іске қосылған. Бұл жүйелердің көмегімен белгілі бір қылмыстарға қатысы бар 70-тен астам азамат, сондай-ақ департаменттің жедел қызмет көрсету аумағында табылған 10 белгісіз мәйіттің жеке басы анықталды, – дейді Н. Жұмабеков.
Ол осы жүйелердің арқасында криминалистер еліміздегі қайғылы қаңтар оқиғасына қатысқан азаматтардың жеке басын анықтай алғанын, бұл өз кезегінде жалпы қылмыстардың ашылуына оң әсер еткенін айтты.
Мәселен, «Папилон» базасы бойынша Алматы әуежайының ғимаратында төңкеріс жасауға қатысқан, қызметтік автокөлікті ұрлап, өртеген тұлғалар анықталды. Сондай-ақ осы жылдың маусымында Қостанай қаласының әуежайы аумағында белгісіз адамның мәйіті табылды. Мәйіттің қоршауда ұзақ уақыт болғаны анықталды. Сыртқы белгілері бойынша мәйіттің жеке басын анықтау мүмкін болмады, тек криминалистердің қажырлы еңбегінің арқасында мәйіттің саусақ іздері алынып, «Папилон» базасында оның жеке басы анықталды.
– Көліктегі ПД криминалистерінің жұмысы ерекше және өте күрделі. Оны сапалы орындау үшін қызметкерлер ғылымның әртүрлі салаларынан хабардар болуы шарт. Күн сайын оларға қылмыстарды ашуға көмектесетін күрделі міндеттерді шешуге тура келеді, – дейді Нұржан Жұмабеков.
